Nagapabilin ang pagsalig ni Defense Secretary Gilberto Teodoro Jr. nga tumanon sang Estados Unidos ang iya mga saad sa Pilipinas kon mag-abot sa mabudlay nga krisis ang sitwasyon sa West Philippine Sea.
Suno kay Teodoro, matuman lamang ini kon mapabilin ang Pilipinas nga kalmado kag malikawan ang paghimo sang bisan ano nga tikang nga mahimo makaguba sa panindugan sang pungsod nga dapat maresolbar sa malinong nga paagi ang territorial dispute, sa baylo nga mangin rason pa sang pagsugod sang kagamo.
Dugang pa sang kalihim, wala sang nagabag-o sa depensa nga komitment sang Estados Unidos sa Pilipinas, tubtob nga wala ini nagahimo sang bisan ano nga pagbag-o sa ila kasugtanan kag sa United Nations Convention on the Law of the Sea (UNCLOS).
Samtang, sang ginpamangkot kon indi na bala malikawan ang posible nga komprontasyon sa China paagi sa armado nga pamaagi, nagpahayag si Teodoro sang pagsalig nga indi ini pagtugutan sang Pilipinas kag sang mga kaalyado sini nga mga pungsod.
Ginpahayag man sang kalihim nga nagapabilin ang dedikasyon sang Pilipinas sa pagresolbar sang mga isyu sa West Philippine Sea paagi sa diplomasya kag pagsunod sa internasyonal nga kasuguan.
Ginhimo ni Teodoro ang nasambit nga pahayag kasabay sang ika-10 nga anibersaryo sang kadalag-an sang Pilipinas sa Permanent Court of Arbitration batok sa China, nga may kaangtanan sa territorial dispute sa West Philippine Sea.











