ROXAS CITY -Ginalauman sang Land Transportation Office ukon LTO nga sa masunod nga bulan ipatuman na ang “doble plaka law” sa mga motorista sa Western Visayas.
Suno sa kay Ms. Riza Otayde, Regional Information Officer sang Land Transportation Office ukon LTO Region-6, nga ginpaiway ang pagpangdaku sang ahensya sa doble plaka law subong nga bulan bangud aminado ang LTO nga wala pa sang mga plaka nga ginpaguwa ang nasambit nga ahensya.
Apang ginpasalig ni Otayde nga gintinguhaan sang LTO nga mapadasig ang pag-release sang mga dalagko nga plaka agud mapatuman na ang nasambit nga layi.
Aminado man si Otayde nga madamo sang mga petisyon nga nabaton ang talatapan sang LTO natuhoy sa doble plaka law.
Matandaan nga sandig sa R.A.11235 ukon Motorcycle Crime Prevention Act, ginamanduan ang mga motorista nga magpahamtang sang duha ka dalagko nga mga plaka sa ginamaneho nga mga motorsiklo.
