Nagpanawagan si anay health secretary kag House Deputy Majority Leader Janette Garin sa Department of Health (DOH) kasunod sa pagkaatrasar sa pagbakal sang bakuna batuk sa trangkaso nga dapat nabaton na sang mga indibidwal ang bakuna subong nga panahon sang trangkaso.
Ginhimo ni Garin ang pahayag kasunod sang report nga ang procurement sang bakuna batuk sa trangkaso ang naatrasar sa ikalima nga kahigayunan nga dapat ginhimo sadtong una nga quarter pa sang tuig.
Ginpaathag pa sang doctor solon nga ang World Health Organization (WHO) amo ang nagapili sang nagkalain-lain nga sahi sang bakuna batuk sa trangkaso kada tuig kag sa tion nga mag-abot sa pungsod ang bakuna batuk sa trangkaso sa bulan sang Disyembre wala na sang pulos ang katuyuan sini.
Suno sa Centers for Disease Control and Prevention (CDC), ang mga virus sang trangkaso sa seasonal flu vaccines ang ginapili kada tuig base sa nagkalain-lain nga data kasubong sang epidemiologic data, genetic data kag antigenic data.
Ginpunto sang mamalidha nga ang pinakamaayo nga oras para mag-angkon sang bakuna batuk sa trangkaso kada Hunyo ukon antes ang tingulan.
Ginhatagan man sang pagtamod ni Garin ang kinahanglanon para sa tuigan nga pagbakuna sang mga vaccine batuk sa trangkaso. Ginahaylo sang mga eksperto kag grupo sa ikaayong lawas ang DOH nga maghatag sang libre nga bakuna batuk sa trangkaso sadtong bulan pa sang Mayo.
