Ginabantayan sang Department of Energy (DOE) ang anuman nga epekto sang El Niño sa tanan nga power grids sa bug-os nga pungsod.
Suno sa ahensya, napreparar na sini ang tanan nga power facilities sa Luzon, Visayas, kag Mindanao Grid, agud masiguro nga handa ang tatlo ka grids sa anuman nga epekto sang weather phenomenon.
Lakip sa mga preparasyon amo ang serye sang mga simulation sa pagtuon sang pagnipis sang suplay sang kuryente sa tuig 2027 kag sa pag-align sang posible nga mga sabat sa amo nga problema, sa tion nga maglala ini.
Wala naman ginadula sang DOE ang posibilidad nga sa baylo sang yellow alert, magasaka na sa red alert ang status sang grid sa Luzon kon maglala ang epekto sang tig-ilinit sa power sector.
Sa tatlo ka mga grids, ginalauman nga ang Visayas ang pinaka-apektado sa bahin sang supply.
Suno sa DOE, ginabantayan na sini ang pagnipis sang suplay sang kuryente sa sina nga grid, nga may plano nga may battery storage system kag power barge sa una nga quarter sang 2027 agud indi na maglala ang pagnipis sang grid.
