Gina-engganyo sang Department of Health (DOH) Region 6 ang mga ginikanan nga pabakunahan ang ila mga kabataan sa liwat nga pagpatigayon sang School-Based Immunization Program sa Western Visayas.
Sa interview sang Bombo Radyo Roxas kay Dr. Cesar Yap Jr., Chairperson sang Committee on Health, iya ginpahayag nga target sang ahensya nga mabakunahan ang kapin 150,000 ka mga kabataan sa elementarya kag high school sa bug-os nga rehiyon.
Sa nasambit nga numero, 62,843 ang Grade 1 learners, 84,142 ang Grade 7 learners nga mabakunahan kontra Measles-Rubella kag Tetanus-Diphtheria, samtang ang mga Grade 4 nga babayi target nga mabakunahan sang Human Papillomavirus (HPV) vaccine.
Dugang pa ni Yap, isa sa mga ginatubang nga kabudlayan sang programa amo ang kahadlok kag kahangawa sang pila ka ginikanan sa posible nga epekto sang bakuna. Apang ginpasalig sang DOH nga ligtas kag epektibo ang tanan nga bakuna kag ginatugyan ini agud maprotektahan ang kabataan kontra sa seryoso nga mga balatian.
Ginpanugyan man sang DOH nga ang pagbakuna sa eskwelahan mas nagapadali sang proseso kag mas nagahatag kahigayunan nga maabot ang mas madamo nga estudyante, bisan pa nga indi tanan nga ginikanan makabisita sa health centers.
Nahibaluan nga nagsugod ang programa sang Agosto 27 kag padayon nga ginapatuman sa pila ka mga eskwelahan sa Western Visayas.
Ginapanawagan man sang DOH-6 ang suporta sang mga ginikanan kag DepEd agud masiguro ang mas mataas nga proteksyon sang kabataan kag komunidad batok sa mga vaccine-preventable diseases.
