ROXAS CITY – Nagapabilin nga COVID-19 free ang Western Visayas ba-se sa pinakaulihi nga monitoring sang Department of Health (DOH) Regional Office VI.
Ginpahayag ni Dr. Marlyn Convocar, Regional Director sang DOH-6 nga ginpasangkad pa sang ahensiya ang surveillance monitoring agud masiguro nga mangin hilway ang Western Visayas sa coronavirus disease 2019.
Partikular nga ginapatuman sang ahensiya ang social distancing nga gina-require sang code red level 2, kalakip ang personal hygiene kag kun mahimo, indi pagtandugon ang nawong sang kamot, bangud mahimo nga isa ini ka pamaagi agud ma-transmit ang virus.
Ginatutukan man ang mga indibidwal nga nagasuprer sang acute respiratory infection sa diin pag-abot sa ikanapulo ka adlaw, ginakuhaan na sila sang swab agud masiguro ang kondisyon sang ila ikaayong lawas.
Nahibaluan man nga sa 45 ka mga Person’s Under Investigation (PUIs) nga na-rekord sa talatapan sa Western Visayas, tatlo na lamang ang confine sa ospital sa Aklan, Antique kag Iloilo samtang ang 42 ka iban pa ang nakaguha na sa ospital matapos nagnegatibo sila sa COVID-19.
Ginklaro man ni Convocar nga 80 porsyento sa mga kaso sang COVID-19 ang nag-ayo apang dapat tutukan ang 20 porsyento nga nagasuprer sang seryoso nga balatian bangud may yara na karon sang local transmission.
