ROXAS CITY-Aminado ang Development Management Officer IV sang Department of Health (DOH) Capiz nga kulang ang numero sang mga contact tracers nga ginhanas sang mga Local Government Units ukon LGU’s sa probinsiya sang Capiz.
Ini ang ginpahayag ni Mr. Joeffrey Espiritu, Development Management Office-IV sang DOH-Capiz sang mainterview sang Bombo Radyo.
Ginpahayag ni Espiritu nga base sa datos nga ginauyatan sang ahensiya, sa 1,061 ka mga miyembro sang contact tracing team sa bug-os na probinsiya, 475 ukon 45 porsyento pa gid lamang diri ang natigayon nga nahanas sa tagsa ka mga LGUs.
Suno kay Espiritu nga 5 pa gid lamang ka mga kabanwahanan ang 100 porsyento nga nakahanas sang ila mga contact tracers, kalakip diri ang banwa sang Dumarao, Ivisan, Maayon, Mambusao, Pontevedra kag Sigma.
Samtang, ang banwa sang Jamindan, Pilar kag Tapaz ang may yara sang pinakamanubo nga numero sang contact tracers nga nahanas.
Gin-athag man ni Espiritu nga na-atrasar ang paghanas sa mga contact tracers sa iban nga mga kabanwahanan bangud ginadumilian ang pagpatigayon sang face to face nga paghanas sa tion nga ginpaidalom sa Enhanced Community Quarantine ukon ECQ ang bug-os nga probinsiya.
Apang suno kay Espiritu nga padayon man ang paghanas sa mga contact tracers matapos nga may pila na ka mga LGus nga gintawag ang atensyon sang DOH.
Mahibaluan nga kabahin sa Contact Tracing Team sang DOH amo ang mga katapo sang kapulisan, City/Municipal Health Officers, iban nga ahensiya sang gobyerno, Health Staffs, Disaster Risk Reduction and Management Officers kag miyembro sang Barangay Health Emergency Response Teams.
