Ginapahunumduman sang Department of Health-Capiz ang publiko nga likawan ang pagnilakat sa kainitan kun wala manlang sang importante nga katuyuan agud nga makalikaw sa nagkalain-lain nga mga balatian.
Sa interview sang Bombo Radyo kay Mr. Joeffry Espiritu, Development Management Officer IV kag Information Officer sang Department of Health Capiz, iya ginpahayag nga madamo sang mga balatian ang mahimo nga makuha kun masobrahan ang exposure sang isa ka tawo sa kainitan.
Suno kay Espiritu, masami nga naga-atakar ang heatstroke ukon sunstroke kag iban pa nga mga skin diseases sa tion sang tag-init.
Pahayag niya, mahimo nga makalikaw sa amo nga balatian kun sundon ang mga pahanumdom sang ila nga talatapan kasubong sang pagsuksok sang mga haluga kag komportable nga mga panapton, pag-inom sang walo tubtob 12 ka baso sang tubig kag pagpahamtang sang kaugalingon sa mahandong kag presko nga lugar.
Dugang pa sang natungdan, pananglitan nga maka-eksperyensya sang kun ano nga sahi sang heat-related illnesses, magpanawag gilayon sang bulig sa mga natungdan agud nga mahatagan sang nagakaigo nga pagbulong.
