ROXAS CITY – Posible tunaan sang kamatayon ang balatian nga tipdas (measles), gani kinahanglan bata pa lang importante nga magpabakuna na batuk diri.
Ini ang ginpahayag ni Mr. Jeoffrey Espiritu, tagpamaba sang DOH Capiz sang ma-interview sang Bombo Radyo.
Suno kay Espiritu, ang tipdas yara sa listahan sang reportable disease nga sandig sa layi kinahanglan i-report sang healthcare workers antes magtakop ang 24-oras nga deteksyon.
Apisar wala ginapili nga edad ang tipdas, masami nga biktima sini ang naga-edad 15-anyos paidalom, kag posible maglaton pinaagi sa droplets gikan sa infected nga persona kun mag-ubo ukon magpangatsi ini malapit sa imo.
Kun malatnan, mahimo makaeksperyensya sang lagnat, rashes nga nagatinir sa kalawasan sang 3 ka adlaw ukon masobra pa, ubo, sip-on, kag pagpalamula sang mata.
Ginpaandam man ni Espiritu nga delikado ang dugang nga komplikasyon nga matuga sang tipdas kag posible mag-angkon sang diarrhea, malnutrisyon, pagkabulag sang mata, pneumonia, paghubag sang utok, kag iban pa nga posible tunaan sang kamatayon.
Sa pihak sini, apisar may pila ka kaso nga nabalhag sa Pilipinas masuwerte nga zero case sa tipdas ang probinsya sang Capiz.
Padayon man ang pagmonitor sang DOH Capiz kag ang pagkampanya sa pagpabakuna batuk sa tipdas sang mga lapsag partikular naga-edad 9 ka bulan ukon antes mag- isa ka tuig agud malikaw sa nasambit nga balatian.
Para naman sa pagbulong, gilayon magkadto sa doktor agud mahatagan sang nutritional support kag oral rehydration kag mahatagan sang iban pa nga bulong.
Samtang sa mga adult nga wala pa nakapabakuna, mahimo magpadulong sa pribado nga doktor agud mabakunahan.
