Ginapahanumdom sang Department of Health-Capiz ang publiko nga magsuksok sang face mask kasunod sang moderate to heavy haze nga naeksperyensyahan sa probinsya.
Ini bangud sa aso nga ginadala sang hangin halin sa forest fires sa Kalimantan, Indonesia.
Sa interview sang Bombo Radyo kay Dr. Cesar Yap Jr., Chairman sang Committee on Health, iya ginpahayag nga posible nga ma-apektuhan sang haze ang indibidwal nga may asthma, mga tigulang kag mga may ginabatyag nga balatian kag naga-maintenance sang bulong.
Suno kay Yap, posible man nga magdamo ang kaso sang ubo kag asthma attacks bangod sa paglapta sang aso kag malain nga kalidad sang hangin.
Nagpanugyan naman ang natungdan sa publiko nga likawan ang pagkadto sa mga lugar nga mataas ang exposure sa aso kag magpabilin sa tagsa-tagsa ka mga puluy-an kon wala sang importante nga kadtuan.
