ROXAS CITY – Nag-apela karon ang Department of Health (DOH) Capiz sa publiko labi na sa mga ginikanan nga pabakunahan ang ila mga anak kontra sa tigdas.
Ini kasunod sang pagdeklarar sang measles outbreak sang ahensya sa National Capital Region (NCR) kalakip na ang Western Visayas kag iban pa nga bahin sang pungsod.
Sa exclusive interview kay Joeffry Espiritu, Development Management Officer 4 sang DOH-Capiz, ginpahayag sini nga importante nga mabakunahan ang mga bata kontra tipdas, para malikawan nga mabutang sa peligro ang ila kabuhi.
Nagpanugyan man si Espiritu sa mga ginikanan nga gilayon dal-on sa mga rural health centers ang ila mga kabataan nga nakitaan sang mga sintomas sang tipdas kaangay sang mataas nga lagnat, rashes ukon red spot, ubo, sip-on, pagpamula sang mata kag paghina sang immune system para ma check sang doctor.
