Nagpaandam ang Department of Health (DOH)-Capiz sa posible epekto sang Hantavirus sa lawas sang tawo.
Sa interview sang Bombo Radyo kay Mr. Joeffrey Espiritu, Development Management Officer IV kag information Officer sang DOH-Capiz, iya ginpahayag nga ang hanta virus ang isa ka viral infection gikan sa direct contact sa mga infected nga sapat kaangay sang ilaga.
Suno kay Espiritu, ang Hantavirus mahimo nga maglala kag magtuga sang gintatawag nga Hantavirus Pulmonary Syndrome (HPS) nga naga-atake sa baga kag nagapabudlay sa pagginhawa.
Pahayag pa niya, posible nga maeksperyensyahan sang sintomas nga hilanat, kakapoy, sakit sa ulo,msakit nga kalawasan, nga daw kaangay sang flu.
Dugang pa sini, ang early detection kag consultation kun makabatyag sang sintomas ang tuman ka importante agud malikawan ang paglala kag pagtapon sang nasambit nga virus.
Nagpahanumdom man ang natungdan , amligan ang ikaayong lawas pamaagi sa pagbag-o sang lifestyle, pagkaon sang masustansya nga pagkaon, tama nga tulog kag pag-ehersisyo agud mapalayo sa bisan ano nga sahi sang balatian.
