ROXAS CITY – Padayon ang pag-edukar sang mga katapo sang Department of Health (DOH)-Capiz sa mga pumuluyo ilabi na sa mga wala pa mabakunahan sang COVID-19 vaccine.
Sa interview sang Bombo Radyo kay Mr. Joeffrey Espiritu, Development Management Officer IV kag tagpamaba sang DOH-Capiz, suno diri nga ini nga lihok ang kadungan sa presidential directives kun sa diin sa sulod sang una nga 100-diyas ni President Ferdinand Marcos Jr., kinahanglan nga mabakunahan sang COVID-19 primary dose ang 90% population sang A2 category ukon mga senior citizens, samtang 50% naman sang general population nga nakabaton sang COVID-19 vaccine, ang kinahanglan nga makabaton sang first dose sang COVID-19 booster shot.
Dugang pa sini nga mahimo man nga ma-adopt sang Capiz ang ginapatuman sang national government nga pagpalapit sang bakuna sa tawo, kaangay sa pagpahamtang sang vaccination site sa eskwelahan, merkado, terminal, private ukon public offices, malls, factory workers, plaza kag simbahan.
Paalinton ni Espiritu nga makabulig ang bakuna sa pagpakigbato sa virus nga dala sang COVID-19, gani magpakig-angut lang sa inyo mga LGU’s sa schedule sang bakunahan sa inyo lugar.
