Gin-athag sang Department of Health (DOH) nga wala sang basihan ang nagalapta nga balita nahanungod sa emergency lockdown sa pungsod bangud sa ginaalegar panibag-o nga COVID-19 variant nga ginatawag “Cicada.”
Suno kay DOH spokesperson Undersecretary Albert Domingo, tubtub nga wala pa sang warning halin sa WHO kag iban pa nga international health bodies, wala sang kabangdanan nga magkabalaka.
Wala pa sang narekord nga kaso sa pungsod nga tuga sang Cicada strain (BA.3.2), nga una nga natukiban sa South Africa sang Nobyembre 2024 kag iya sang Omicron lineage, suno sa World Health Organization.
Dugang pa sang DOH nga mas ginatutokan subong sang ahensya ang mga balatian nga may kaangtanan sa mainit kag mamala nga panahon, subong man ang contingency planning sang national health system kadungan sang subong nga state of national energy emergency.
Sa subong, ang variant ang na-record sa 23 ka mga pungsod kag yara pa sa idalom sang kategorya sang COVID variant nga gina-monitor.
Nagpanugyan man sila sa publiko nga indi magpalapta sang fake news kag magsalig lamang sa opisyal nga impormasyon.
