Ginapangabay sang Department of Health (DOH) ang publiko nga gamiton ang National Emergency Hotline 911 kun kinahanglan ang emergency care bangud sang mabaskog nga epekto sang El Niño sa ikaayong-lawas.
May kaangtanan ini sa ginapaabot nga mabaskog nga El Niño sa pungsod tubtob sa una nga quarter sang masunod nga tuig, nga nagapukaw sang kabalaka sa madamo nga Pilipino bangud sa posible nga epekto sini.
Isa sa mga nagapanguna nga ginakabalak-an amu ang heat exhaustion nga mahimo magresulta sa heat stroke, isa ka makahalalit nga medical emergency.
Mahimo ini magresulta sa pagkadula sang animo, peligroso nga pagtaas sang temperatura sang lawas, kabudlayan sa pagginhawa, kag pagkalipat, pag-utal-utal, ukon kombulsyon.
Bangud sini, ginpahanumdom sang ahensya nga kun may makita nga bisan ano nga senyales sang heat stroke, dapat gilayon nga magtawag sa 911 ukon dal-on ang pasyente sa pinakamalapit nga ospital.
Ginarekomendar man sang ahensya ang pagsuksok sang mamag-an, maluwag, kag light-colored nga mga panapton, kag ang masami nga pag-inom sang walo tubtob pulo ka baso sang tubig kada adlaw.
