Gin-anunsyo sang Department of Health (DOH) nga masobra 300 ka mga HIV care facilities ang naga-operate subong sa pungsod agud mapalapit ang serbisyo sa mga Pilipino.
Suno sa DOH, may yara sang 338 ka mga pasilidad nga nagahatag sang libre nga serbisyo may kaangtanan sa HIV kaangay sang screening kag confirmatory testing, antiretroviral therapy, counseling, combination prevention methods, kag viral load testing.
Sa kabug-usan, 186 sang mga pasilidad ang nahamtang sa Luzon, 77 sa Visayas, kag 75 sa Mindanao, bilang kabahin sang lihok sang DOH nga mangin mas accessible ang HIV care sa nagkalain-lain nga rehiyon.
Suno kay Health Secretary Teodoro Herbosa, makabulig ang pagdamo sang treatment hubs agud mapadali ang testing. Ginsiling man sini nga ang mga self-test kits ginapanagtag paagi sa mga civil society organizations.
Kadungan sini, nagahatag naman sang Outpatient HIV/AIDS Treatment (OHAT) Package ang Philippine Health Insurance Corporation nga nagalab-ot sa P58,500 kada pasyente kada tuig agud suportahan ang mga nagapaidalom sa pagbulong.
Suno kay Herbosa, nagapakig-istorya man siya sa United States Department of State para sa access sa lenacapavir, isa ka long-acting injectable treatment nga gina-inject makaduha kada tuig.
Ginhatagan pagtamod sang DOH nga padayon nga nagalala ang HIV sa pungsod, kag suno sa projections, mahimo nga maglapaw sa 457,000 ang numero sang mga tawo nga may HIV sa Pilipinas sa tuig 2030 kon magpadayon ang karon nga trend.
