Ginpanginwala naman sang Department of Health (DOH) ang ginaalegar pagpatuman sang lockdown sa pungsod bangud sa balatian nga tipdas.
Ginhimo sang ahensiya ang paathag sa tunga sang paglapta sang mga peke nga Facebook post may kaangtanan sa pagpatuman sang lockdown bangud sa nasambit nga balatian.
Gin-athag ni Health spokesperson ASec. Albert Domingo nga indi na kinahanglan nga ipatuman ang lockdown bangud indi airborne ang mpox ukon indi man nagalaton paagi sa hangin ang virus kaangay sang COVID-19.
Suno sa opisyal sang DOH, mas madamo sa gihapon ang na-record nga kaso sang tipdas sang 2024 ikumparar subong nga tuig. Ginpahayag man sini nga mas madamo ang narekord sa bulan sang Abril sang sa sini nga Mayo 2025.
Sa pihak nga bahin, gin-angut naman ni ASec. Domingo ang subong nga record sang mga kaso sang mpox sa pagka-aktibo sang mga lokal nga panguluhan sa pag-anunsyo sang mga natukiban nga kaso sa ila mga lugar nga ginasakpan.
Samtang, ginklaro ni ASec. Domingo nga ang Clade 1B variant sang mpox nga na-record sa iban nga pungsod ang wala pa nakasulod sa pungsod ukon na-detect sa Pilipinas.
Ginpahayag man sang opisyal nga wala sang malain sa pagsuksok sang face mask suno sa ginapatuman sang pila ka LGUs agud malikawan ang balatian. Apang ginklaro sang opisyal nga nagalaton ang mpox pinaagi sa close contact ukon skin to skin, gani dapat suno sa iya ipatuman ang precautions base sa kon paano nagalaton ang balatian.
Nagahingyo ang DOH sa mga lokal nga gobyerno nga magkoordinar sa ahensya agud ma-assess ang mga precautions nga dapat ipatuman agud malikawan ang paglapta sang balatian.
