Ginpasalig sang Department of Health (DOH) nga may nagakaigo nga supply sang libre nga bulong sa pagbulong sang Human immunodeficiency virus (HIV) kag testing kits.
Ini ang pasalig ni Health Secretary Ted Herbosa matapos ginrekomendar sang departamento ang pagdeklarar sang HIV bilang national health emergency matapos nga ang Pilipinas ang nagapanguna nga may pinakamadamo nga bag-o nga kaso sang HIV sa Western Pacific Region.
Suno sa tiglikom, sa iya pagbisita sa ospital sang San Lazaro, isa ka mayor nga treatment hub nga ginapadalagan sang gobyerno para sa “people living with HIV” (PLHIV), kumpleto na ang ila supply sang antiretroviral drugs.
Ginsiling sini nga ang isa ka pasyente ginahatagan na karon sang tatlo ka bulan nga supply sa tion nga magkadto ini sa ospital kag gina-re-supply sang ARV treatment kada tatlo ka bulan.
Ginhatagan man pagtamod sang hepe sang DOH nga libre ang bulong nga ginabayaran sang Philippine Health Insurance Corporation (PhilHealth).
Ang mga HIV self-test kits mahimo mabakal sa mga botika sa bug-os nga pungsod. Apang ginklaro ni Sec Herbosa nga kinahanglan sa gihapon sang confirmatory test ang mga nagapakuha sang HIV test sa mga treatment hub.
