Hugot nga ginabantayan sang Department of Health (DOH) ang presyo sang mga bulong kasunod sang nagaluntad nga krisis sa langis
Suno kay DOH spokesperson kag Undersecretary Albert Domingo, padayon ang ila monitoring samtang nagahimo man sang iban pa nga mga tikang kaangay sang inventory checks kag contingency planning, partikular sa mga ospital sang DOH agud masiguro nga indi maatrasar ang supply sang bulong kag medical supplies.
Una na nga ginpahayag sang DOH nga padayon ang ila monitoring sa presyo sang ila mga bulong kag kagamitan matapos nagpaandam ang isa ka ekonomista nga posible maapektuhan ang health sector sang inflation tuga sang krisis sa Middle East.
Dugang pa ni Domingo, dapat siguraduhon sang PhilHealth nga makadungan ini sa ginalauman nga pagsaka sang demand sa health services.
Samtang, gin-engganyo sini ang publiko nga hangpon ang breakdown ukon “unbundling” sang mga balayran sa mga pribado nga ospital, ilabi na sa tunga sang pagtaas sang presyo bangud sang inflation.
Pahayag pa sini nga mas maintindihan sang publiko ang pagsaka sang balayran kun maathag ang breakdown sini, kag makabulig man ang DOH paagi sa Zero Balance Billing kag PhilHealth paagi sa husto nga benepisyo.
