Nagpaandam ang Department of Health (DOH) kag Bureau of Quarantine (BOQ) sa publiko parte sa bag-o nga patakaran sang U.S. Centers for Disease Control and Prevention (CDC) nga nagapatuman sang mandatory nga health declaration sa tanan nga pasahero nga makadto sa Estados Unidos.
Ginhimo ini nga patakaran bangod sa peligro sang paglapta sang Ebola virus nga ginhalinan sang Bundibugyo virus sa Democratic Republic of the Congo (DRC).
Kinahanglan nga ang kada pasahero magpirma kag magpamatuod nga wala siya nakadto ukon nagtiner sa Democratic Republic of the Congo sa sulod sang nagligad nga 21 ka adlaw antes sang iya paghalin.
Sakop man sang sini nga patakaran ang mga pasahero nga nag-agi ukon nag-transit lang sa bisan diin nga airport sa nasambit nga lugar, bisan wala sila nagguwa sa eroplano ukon naghalin sa sulod sang airport terminal.
Ginapahanugutan kag ginapatuman sang mga awtoridad ang tanan nga international airlines nga usisaon anay ang amo nga dokumento antes magpasakay sang mga pasahero. Ang mga pasahero nga indi magsunod ukon magdumili sa pagpirma sang dokumento indi pagpasakayon sa eroplano.
Ginaabisuhan sang DOH kag BOQ ang tanan nga pasahero nga magpakig-angot dayon sa ila airline agod mahibaluan ang mga kinahanglanon nga dokumento. Ginapahanumdom man ang tanan nga maghatag sang husto kag matuod nga impormasyon parte sa ila travel history.
Padayon man ang DOH kag BOQ sa ila 24/7 nga pagbantay kag pagmonitor sa mga airport agod maprotektahan ang ika-ayong lawas kag kaluwasan sang publiko.
