Nakatalana nga magpadala ang Department of Health (DOH) sang healthcare workers sa Jamaica.
Ini ang kasunod sang pagperma sang DOH kag Ministry of Health sang Jamaica sa isa ka memorandum of understanding (MOU) nga magatugot sa pagpadala sang mga Pilipino nga healthcare workers sa Jamaica para sa capacity building.
Wala naman gintumod sang DOH kun ano kadamo ang healthcare workers nga igapadala sa Jamaica.
Ginpirmahan ang nasambit nga kasunduan nanday Philippine Health Secretary Teodoro Herbosa kag Jamaican Health Minister Christopher Tufton sa Kingston, Jamaica.
Sa idalom sang kasunduan, may yara sang bayluhanay sang mga kaalaman ang 2 ka pungsod sa mga patag kasubong sang biotechnology kag epidemiology kag pagsabat sa health workforce sustainability.
Samtang, committed naman si Sec. Herbosa sa gilayon nga pagpadala sang mga Pilipino nga healthcare workers sa Jamaica nga nagatuyo nga hasaon pa ang ila kapasidad pinaagi sang exposure sa healthcare system sang Jamaica samtang ginabuligan ang health workforce shortage sa pungsod.
