Narekord sang Department of Health (DOH) ang kabug-usan nga 8,171 ka kaso sang dengue humalin Hulyo 6 tubtob 19 sini nga tuig.
Apisar suno sa ahensya, mas manubo ini sang 33% ipaanggid sa na-record nga kaso sang ulihi nga semana sang Hunyo 22 tubtob Hulyo 5 nga naglab-ot sa 12,166 ka kaso sang dengue.
Ang pagkarekord sang linibo ka kaso sang dengue sang nagligad nga mga binulan ang ginatumod sa gihapon sa sunod-sunod nga mga kalamidad nga nag-igo sa pungsod.
Kaangot sini, maid-id nga ginamonitor sang ahensya ang narekord nga kaso sang dengue sa nagkalain-lain nga lugar sa pungsod.
Nagpanugyan man ang ahensya nga indi magpakampante sa pamahog sang dengue, masilak man ukon maulanon, kag ginpahanumdom ang mga tawo nga magpraktis sang 4Ts – taob, taktak, tuyo, kag takip kada alas 4 s.h. agud madula ang mga breeding sites sang lamok, ilabi na subong nga tig-ululan.
