Gin-alerto na sa karon sang Department of Health ang surveillance system sang mga ini kasunod sang deklarasyon sang Africa Centers for Disease Control and Prevention (CDC) sang public health emergency bangud sa mpox outbreak sa ila pungsod.
Kun matandaan, nagdeklarar ang Africa Centers for Disease Control and Prevention sang public health emergency of continental security bangud sa pagtaas sang kaso sang mpox ukon monkeypox.
Ini ang naglapta nga gikan sa Democratic Republic of Congo tubtob sa mga kalapit nga pungsod.
Suno naman kay DOH spokesperson Assistant Secretary Albert Domingo, sa karon, nagdangat palang sa siyam ang kaso sang nasambit nga sakit sa Pilipinas.
Humalin sa nasambit nga numero, apat diri ang na detect sang tuig 2022 samtang ang lima pa nga kaso ang nairekord sang tinalikdan nga tuig.
Sang Hunyo, ginpamatud-an sang DOH nga isa ka indibidwal gikan sa Central Visayas ang napatay bangud sa mpox, kag gin-athag nga wala sa siyam nga kaso ang napatay bangud sa balatian nga tuga sang monkeypox virus.
Suno sa World Health Organization (WHO), ang mga sintomas sang mpox amo ang ginakalakipan sang skin rash nga ginahilanat, palanakit sang ulo, palanakit sang likod, kag manubo nga enerhiya.
Gindeklarar man sng WHO sang Hulyo tuig 2022 ang mpox bilang isa ka public health emergency of international concern kag gintapos sini ang deklarasyon sa bulan sang Mayo sang tinalikdan nga tuig.
