ROXAS CITY – Nakarekord ang Department of Health (DOH) sang madasig nga pagtaas sang kaso sang leptospirosis sa pungsod.
Ini matapos nga pila ka adlaw sang gin-anunsyo sang PAGASA Weather Bureau ang pagsugod sang tig-ululan.
Ginpahayag ni DOH Assistant Secretary kag Spokesman Dr. Albert Domingo, nakit-an nila ang pagtaas sang numero sang mga naigo sang leptospirosis sumugod sadtong bulan sang Mayo.
Sa monitoring sang DOH, halin sa anom na kaso sadtong Mayo 5 tubtob 18, nangin 60 ang kaso sini sadtong Mayo 19 tubtob Hunyo 1, 2024.
Pag-abot naman sang Hunyo 2 tubtob Hunyo 15, narekord nila ang 83 nga kaso kag posible nga madugangan pa ini bangud sa delayed nga pag-abot sang mga reports halin sa mga regional office.
Naglab-ot naman sa 84 ang numero sang mga napatay sa nasambit nga sakit sadtong 2024. Ang leptospirosis ang isa ka sahi sang bacteria nagikan sa mga higko kag ihi sang sapat kag mga insekto nga kalabanan nagasulod sa tawo nga nagalusong sa baha nga may pilas ang tiil kun sa diin ang mga sintomas sini amu ang pagpalanakit sang lawas, lagnat, pagsuka, pagpamuhin, kag pagpalangmula sang mata.
