Pagatukuran na sang mga first aid facilities ang mga gapanguna nga tourist destination sa nagkalain-lain nga bahin sa pungsod, suno sa Department of Health (DOH).
Pila sa mga posible nga mauna nga pagatukuran sang mga nasambit nga pasilidad amo ang Boracay, Siargao, Panglao, La Union, Palawan, Puerto Galera, kag iban pa, sa idalom sang programa nga pagatawgon bilang Tourist First Aid Facilities program.
Ang mga nasambit nga pasilidad ang magasilbi nga emergency response center para sa mga turista nga posible nga maaksidente samtang nagabisita sa mga nasmbit nga lugar.
Ang magatindog nga staff diri amo ang mga healthcare professionals nga nag-agi sa nagakaigo nga training.
Pagahamtangan man ang mga ini sang bastante nga medical supplies kag mga medisina para masiguro nga mangin epektibo ang pagbulig.
Ang mga igatukod nga building ang may yara sang duha ka mga palapag. Ang ikaduha nga palapag ang maga-serve bilang lifeguard station ukon viewing deck para mabantayan ang seguridad sang mga turista.
Ang una naman nga palapag ang maga-serve bilang first aid kag emergency room.
Ang nasambit nga plano ang pinaagi sa pagbuliganay sang Department of Tourism (DOT), DOH kag ang Tourism Infrastructure and Enterprise Zone Authority (TIEZA).
Ang mga nasambit nga ahensiya ang una na nga nagpirma sang Memorandum of Understanding para isa-pormal ang amo nga proyekto.
