Ginkumpirmar sang Department of Justice nga naaresto sang mga otoridad sa San Francisco, California, USA si retired PCol. Royina Garma kaupod ang bata sini nga si Angelica Garma.
Kaangut sini, ginmanduan gilayon sang Justice Department ang Bureau of Immigration nga pangunahan ang proseso sang pagpabalik sa pungsod ni Garma.
Napabalita nga nakaguwa ini sang Pilipinas sa pihak sang iya promise nga magatambong ini sa mga masunod nga pagdinig sang House Quad Committee natuhoy sa madugong war on drugs sang nakaligad nga administrasyon ni Duterte.
Suno kay Justice Assistant Secretary Atty. Mico Clavano, naglaum ang Department of Justice nga sa pihak sang pagkakas sang Kamara sa iya contempt order, magapakig-angut gihapon ini sa imbestigasyon sang komite.
Sa isa ka pahayag, gintalupangod ni Justice Secretary Jesus Crispin Remulla nga nagapabilin nga committed ang ila ahensya agud mapabilin ang integredad sang justice system sang pungsod.
Para naman sa kabug-usan nga detalye, siling sang ahensya nga ang PNP kag DILG ang may ara sang kompleto nga record sang nasambit nga insidente.
