Dalayon na nga naka-rekober ang mga lugar nga anay apektado sang lapnagon nga oil spill dala sang naubon nga MT Princess Empress.
Matandaan nga sadtong Pebrero 28, 2023 ukon duha na ka tuig ang nakaligad, naubon ang nasambit nga barko sa kadagatan nga sakop sang Mindoro samtang karga sini ang 900,000 litro nga industrial fuel.
Nagresulta ini sang lapnagon nga oil spill kung sa diin naglab-ot pa sa mga probinsya sang Palawan, Antique, kag Batangas nga naka-apekto sa pangabuy-anan sang linibo nga pumuluyo samtang apektado man ang mga aquatic kag maritime resources sang pungsod.
Duha ka tuig sumugod sadto, ginsiling sang Department of Justice nga naglab-ot na sa masobra 32,000 nga mga indibidwal ang nakabaton snag compensation nagikan sa International Oil Pollution Compensation (IOPC).
Kadam-an sa mga ini mangingisda samtang ang iban naman mga tourism workers.
Pila sa mga apektado ang nakabaton sang P100,000.00 samtang ang pinakadako nga nabaton naglab-ot sa P700,000.00.
Suno kay DOJ Usec. Raul Vasquez, indi palarehas ang sitwasyon sang mga naapektuhan sang oil spill kung sa diin ang iban sa ila naka-depende lamang ang pangabut-anan sa pagpangisda rason nga mas dako ang nakuha nga bulig.
Samtang, ginsiguro naman sang DOJ official nga padayon nga makig-angut ang ahensya sa OIPC agud mabantayan ang claims sang mga pumuluyo.
Posible nga pag-abot sang 2026 magalab-ot na sa 40,000 ang numero sang mga makabaton sang compensation.
