Kumpiyansa gihapon ang Department of Justice ukon DOJ nga makita kag madakpan sang mga awtoridad ang pugante nga si Charlie “Atong” Ang.
Suno kay Prosecutor General Richard Anthony Fadullon, may pagsalig sila sa mga operasyon sang Philippine National Police ukon PNP kag iban pa nga awtoridad nga makita nila ang lokasyon ni Ang.
Bisan wala pa siya nadakpan tubtob subong, padayon ang pagpakig-angot sang DOJ sa mga ahensya sang gobyerno nga nagadakop kag nagapangita sang mga suspetsado.
Nagalaum man ang DOJ nga madala sa korte si Atong Ang para atubangon ang mga kaso nga ginpasaka batok sa iya may kaangtanan sa pagkadula sang mga sabungero.
Matandaan nga ginpasakaan siya sang mga kaso kag ginatudlo nga posible nga “mastermind” sa kaso sang mga missing nga mga sabungero.
Si Charlie “Atong” Ang nagaatubang sang kaso nga kidnapping with homicide kag kidnapping with serious illegal detention may kaangtanan sa pagkadula sang mga sabungero.
Suno sa pinakabag-o nga ginpahayag ni Prosecutor General Fadullon, nakita sang ahensya nga naganubo na ang kadamuon sang mga pamilya ukon nagareklamo nga padayon nga gapakig-angot sa DOJ parte sa kaso sang mga missing nga mga sabungero.
Suno pa sa iya, isa na lang ka pamilya ukon himata ang padayon nga nagapakig-angot sa Department of Justice parte sa kaso nga ginpasaka.
Apang ginpabutyag sang DOJ nga indi maapektuhan ang kaso sang mga missing nga mga sabungero bisan indi na makontak ang mga pamilya sang mga missing.
