Ginpadayon sang Department of Justice (DOJ) ang preliminary investigation may kaangtanan sa mga reklamo nga ginpasaka sang Securities and Exchange Commission (SEC) batok sa pamilya Villar kag sa ila mga kompanya. Sa nagliligad nga pagdinig, wala nagtambong personal ang mga miyembro sang pamilya Villar, apang ginrepresentahan sila sang ila mga abogado.
Suno sa DOJ, ang pila sa mga respondents nagpasaka sang mga mosyon kag nangayo sang dugang nga tion agud makasumiter sang ila mga counter-affidavit ukon kontra-salaysay. Ginbaton naman sang panel of prosecutors ang ila kahangyo kag gintugyanan sila sang dugang nga palugit para makakompleto sang mga kinahanglanon nga dokumento.
Lakip sa mga ginareklamo amo sanday Manuel Villar Jr., Cynthia Villar, Mark Villar, kag Camille Villar, kaupod ang iban pa nga opisyal sang Villar Land Holdings. Ang mga reklamo nagasentro sa ginapaathag nga paglapas sa Securities Regulation Code, lakip na ang market manipulation, insider trading, kag misleading disclosures.
Padayon nga ginasusi sang DOJ kon may igo nga basehan agud makapasaka sang pormal nga kaso sa korte batok sa mga respondents.
