Nagtukod sang isa ka “special panel of prosecutors” ang Department of Justice agud magpatigayon sang imbestigasyon angut sa mga insidente nga natabo sa Senate of the Philippines sang nagligad nga semana.
Sa iya liwat nga pag-atubang sa publiko matapos ang iya paghipos sa tunga sang mga isyu, gin-anunsyo ni Fredderick Vida ang pagtukod sang espesyal nga grupo.
Suno sa secretary, katuyuan sang “special panel” nga may yara sang mas lawig kag maid-id nga “case-buildup investigation” agud mausisa kag maimbestigahan sang maayo ang mga natabo sa sulod kag palibot sang Mataas nga Kamara sang Kongreso.
Ginpahayag man niya nga ang mga piskal nga kabahin sang grupo hatagan sang awtoridad nga mag-isyu sang subpoena kag iban pa nga kinahanglanon sa imbestigasyon.
Bangud sini, ginmandu-an ni Justice Sec. Vida ang mga law enforcement agencies nga isumiter sa departamento ang tanan nila nga ebidensya may kaangtanan sa mga natabo sa Senado.
Partikular sini nga ginmanduan nga magkooperar ang Philippine National Police Scene of the Crime Operatives, National Capital Region Police Office, Pasay City Police Station kag National Bureau of Investigation.
Ang mga nasambit nga ahensya ginhatagan sang 48 oras para mapreserbar kag masumiter ang tanan nga ebidensya may kaangtanan sa mga natabo sa “Senate Complex” halin Mayo 11 tubtob Mayo 13.
Kalakip man sa ginmandu-an sang DOJ ang Office of the Senate Sergeant-at-Arms paagi sa opisina ni Alan Peter Cayetano nga magsumiter sang ila report natuhoy sa mga insidente.
Lakip sa mga kinahanglan isumiter amu ang CCTV footages, ballistic kag paraffin examination results, deployment records, communication logs, incident reports, witness statements kag iban pa nga ebidensya.
Ginpaandaman man sang secretary ang publiko kag mga miyembro sang media nga magpakig-angot sa “special panel of prosecutors” kun may yara sila sang impormasyon ukon ebidensya nga makabulig sa ginapatigayon nga komprehensibo nga imbestigasyon.
