Wala sang nakita nga isyu ang Department of Justice (DOJ) sa paggawad sang clemency kay Mary Jane Veloso, ang Pinay nga ginpamatbatan sang kamatayon sa Indonesia may kahilabtanan sa iligal nga droga nga nakabalik na sa Pilipinas sang Miyerkules makaligad ang masobra 14 ka tuig nga pagkabilanggo sa nasambit nga pungsod.
Apang gin-athag sang DOJ nga ang nasambit nga desisyon ang nakasandig kay President Ferdinand Marcos Jr.
Ginpahayag naman ni Justice USec. Raul Vasquez nga ang DOJ ang isa sa mga lupon nga mahimo magrekomendar kay President Marcos para sa masunod nga mangin tikang sa kaso ni Veloso.
Sang ginpamangkot naman sang DOJ official kun ginrekomendar na ini sang ahensiya sa Presidente, ginpahayag ni USec. Vasquez nga pagaistoryahan ini sang mai-id-id kag kasubong sang ginpahayag ni PBBM, on the table na ukon nakaplastar ini para pagahinalaan kaupod ang iban pa nga persons deprived of liberty (PDLs) nga nakatalana nga gawaran sang clemency.
Nagapati naman ang DOJ official nga indi ini magahatag sang negatibo nga mensahe sa Indonesia bangud sila mismo ang nagplastar kay Veloso para mabalik sa pungsod, kag karon nga ara na ini sa Pilipinas bilang isa ka PDL, napaidalom ini sa tanan nga mga kinamatarong kag pribilehiyo sandig sa kasuguan sang pungsod.
Gin-athag naman sang opisyal nga wala sang special treatment kay Veloso samtang naka-detain ini sa Correctional Institution for Women para padayunon ang pagserbe sang iya sentensiya.
Apang ginsiguro naman sang DOJ official nga namanduan ang Bureau of Corrections (BuCor) nga siguruhon ang kaluwasan kag kahimtangan ni Veloso.
