ROXAS CITY – Ginareklamo karon sang isa ka ginang ang doktor kag nurses sang Roxas Memorial Provincial Hospital bangud sa ginaalegar sobra-sobra nga dosage sang bulong nga ginturok sa iya anak sang ma-confine ini sa amo nga ospital.
Sa interview sang Bombo Radyo sa wala na ginhingadlan nga ginang, ginpahayag sini nga masami naganubo ang potassium level sang iya anak rason nga masami nila ini nga ginadala sa ospital.
Suno diri nga apat ka adlaw matapos ma-confine ang iya anak sadtong Disyembre 18, 2019, ila ginkakibot sang nagdesisyon ang doktor nga doblehon ang dosage sang bulong kag vials nga ginaturok sa iya anak.
Bangud diri naglain ang pamatyag sang iya anak, nagpalanakit ang ulo kag bilog nga gab-i ini nga nagadeliryo.
Sang ginhambalan sang ginang ang mga nurses ginaalegar nga kasubong wala ang mga ini sang labot kag pagkaaga na nadesisyunan nga ipasulod sa Intensive Care Unit (ICU) ang iya anak.
Pila ka semana na ang nakaligad humalin sang nakaguha sa ospital ang anak sang ginang apang sa karon, ginapahayag nga indi na sini halos mahulag ang iya nga kamot nga ginturukan.
Posible suno sa ginang nga epekto ini sang sobra-sobra nga bulong nga ginturok sa iya anak.
Desidido naman ang ginang nga ipalab-ot sa pamunuan sang ospital ang iya nga reklamo agud nga matudluan sang leksiyon ang mga responsable sa nasambit nga hitabo.
