Magakoodinar ang Department of Labor and Employment (DOLE) Region VI sa Department of the Interior and Local Government (DILG) kag sa mga local government units agud masiguro ang pagpatuman sang bag-o nga minimum wage sa rehiyon.
Sa interview sang Bombo Radyo kay Atty. Sixto Rodriguez Jr., Regional Director sang DOLE-6, iya ginpahayag nga ginahulat na lamang sang ahensya ang pormal nga dokumento antes ipatuman ang wage order.
Sa idalom sang bag-o nga wage order, magadugang sang ₱40 tubtob ₱45 ang adlaw-adlaw nga sweldo sang mga mamumugon sa non-agriculture kag agriculture sectors, samtang ₱500 naman ang dugang sa binulan nga sweldo sang mga domestic worker ukon kabulig.
Suno kay Rodriguez, mangin mandatory ukon obligado na sa mga employer ang pagsunod sa bag-o nga minimum wage sa tion nga mangin epektibo na ang wage order.
Gin-agda man sini ang mga employernga ipatuman ang pagtaas sang sweldo samtang magapatigayon ang DOLE-6 sang monitoring agud masiguro nga nagasunod ang tanan nga establisimyento sa bag-o nga wage order.
