ROXAS CITY – May gindihon nga programa ang Department of Labor and Employment (DOLE) Region 6 agud mabuligan ang nadulaan sang trabaho kasunod sa pagsarado sang pila ka mga establisemento bangud sa COVID-19 pandemic.
Ginpahayag ni Niezel Anen Sabrido, DOLE-6 Senior Labor and Employment Officer nga ba-se sa datus nga gina-uyatan sang ahensiya, may 8 ka mga establisemento sa probinsiya ang nagpatuman sang permanent closure kag kapin sa 80 ka mga indibidwal ang naapektuhan.
Magluwas diri may siyam man ka mga establisemento ang nagpatigayon sang retrenchment ukon nagpangbuhin sang ila mga trabahador sa diin 66 naman ka mga empleyado ang nadulaan sang trabaho.
Kalakip sa mga nagpatigayon sang permanent closure amo ang yara sa tourism sector, food service, transportation, repair, motor vehicle, insurance kag administrative works.
Gilayon nag-asister ang DOLE pinaagi sa Tulong Panghanapbuhay sa Ating Disadvantaged / Displaced Workers (TUPAD) program.
May ginadihon man nga lihok ang ahensiya bilang complementary program sa Balik Probinsiya program sang gobyerno.
Bangud wala pa sang specific nga programa ang ahensiya para sa mga nadulaan sang trabaho sa karon, ginatugyan nila ini sa SSS nga may unemployment insurance benefit program.
Samtang may ginpatigayon nga joint interim guidelines ang DOLE kag DTI sa operasyon sang mga commercial establishments sa diin nagabisita sila sa mga establisemento agud matsekyar kun gina-implementar ang nasambit nga pagsulundan.
