Ginpakigbahin sang Department of Labor and Employment (DOLE) Capiz Field Office ang mga detalye may kaangtanan sa ila ginapatuman nga High Impact, High Visibility Inspection sa construction sector.
Sa interview sang Bombo Radyo kay Atty. Maria Ailyne Valaquio-Pueblo, head sang Department of Labor and Employment (DOLE) Capiz Field Office, iya ginpahayag nga kabahin ini sang ila padayon nga kampanya pagsiguro nga nasunod sang mga construction company kag contractors ang labor laws kag occupational safety and health standards para sa ila mga trabahador.
Suno kay Pueblo, ginatutukan sa inspeksyon ang pagsunod sa minimum wage, benepisyo sang mga empleyado, seguridad sa trabaho, kag paggamit sang angay nga personal protective equipment (PPE) sa mga construction site.
Pahayag pa niya, ang programa nagatinguha nga makalikaw sa anuman nga sahi sang mga aksidente sa trabaho nga mahimo magbutang sa peligro sa kabuhi sang mga mamumugon sang konstruksyon.
Nagpaandam man sang ahensya sa mga contractor kag employers nga mahimo sila mapatawan sang nagakaigo nga penalidad ukon work stoppage order kon mapamatud-an nga may seryoso nga paglapas sa labor standards kag safety regulations.
Nagapanawagan man ang natungdan sang kooperasyon sang mga construction firms agud masiguro ang luwas kag maayo ang kahimtangan sang pagtrabaho para sa tanan.
