Ginkadismaya sang Department of Labor and Employment (DOLE)-Capiz ang ginapahayag nga may pila ka barangay officials sa banwa sang Panay nga nagapangaltas sa mga benepisyaryo sang TUPAD Program.
Sa interview sang Bombo Radyo kay Atty. Ma. Ailyne Pueblo, head sang DOLE-Capiz Field Office, iya ginpahayag nga gilayon sila nga nagpatigayon sang inisyal nga imbestigasyon matapos nila nahibaluan ang nasambit nga reklamo.
Suno kay Pueblo, nagakadapat nga mabaton sang mga benepisyaryo ang bug-os nila nga sweldo bangud ila man ini gintrabaho sa sulod sang napulo ka adlaw.
Nagpanawagan man ini sa mga benepisyaryo sang amo nga programa nga may kaangay nga sitwasyon nga magpalapit gidayon sa ila opisina ukon magpasaka sang reklamo.
Ginpasiguro sang DOLE-Capiz nga handa sila nga magbulig kag maghimo sang nagakaigo nga tikang agud masiguro nga mabaton sang mga benepisyaryo ang bug-os nga benepisyo sa idalom sang programa.
