Magapatigayon sang nagkalain-lain nga aktibidad ang Department of Labor and Employment (DOLE) sa probinsya sang Capiz bilang pagselebrar sang Labor Day, nga may tema nga “Disenteng Trabaho Para sa Lahat: Iisang Hangarin, Bagong Pilipinas Sama-samang Mararating.”
Sa interview sang Bombo Radyo kay Atty. Ma. Ailyne Valaquio-Pueblo, head sang DOLE-Capiz Field Office, iya ginpahayag nga tatlo ka mga programa ang ila igapatuman subong nga adlaw.
Una, ang cash release para sa mga benepisyaryo sang Tulong Panghanapbuhay sa Ating Disadvantaged/Displaced Workers (TUPAD) program nga kabahin sang padayon nga bulig sang gobyerno sa mga informal sector.
Ikaduha, magapatigayon sang Kadiwa store, kun sa diin hatagan sang oportunidad ang mga lokal nga mangunguma nga maibaligya ang ila mga produkto sa mas manubo nga presyo para sa benepisyo sang consumer kag producers.
Samtang, ikatatlo naman Trabahustisya program, nga may tinutuyo nga maghatag sang ihibalo kag giya sa mga nagapangita sang obra, labi na gid sa mga first-time job seekers, agud mas maintindihan nila ang mga kinahanglan tandaan kag ila mga katungdanan sa sulod sang isa ka trabaho.
Dugang pa sang opisyal, padayon man ang ginapatigayon nga job fair sang DOLE regional office bilang sabat sa kakulangan sang trabaho sa pungsod kag agud mas madamo pa ang mahatagan sang oportunidad .
Gin-athag man sang natungdan nga ang pagdumdom sang DOLE sa mga mamumugon wala lamang nagatapos sa Labor Day, kundi adlaw-adlaw nila ginahatagan sang serbisyo ang mga ini agud mapahapos kag mapabaskog ang ila pangabuhi kag produktibidad.
