ROXAS CITY – May mga ginadihon na nga tikang ang Department of Labor and Employment (DOLE) agud mabuligan ang mga trabahador nga maapektuhan sang community quarantine bangud sang mga preventive measures batuk sa balatian nga coronavirus disease (COVID-19).
Ini ang ginpahayag ni Niezel Sabrido, ang Information Officer sang DOLE-Regional Office 6 sang mainterview sang Bombo Radyo.
Suno kay Sabrido nga nagpapanaog na ang DOLE central office sang labor advisory kag department order agud masabat ang problema sa mga apektado nga trabahador bangud sang border control measures sa Rehiyon Sais ilabi na ang yara sa pribado nga sektor.
Una diri suno sa iya, sandig sa labor advisory sang ahensiya, ginamanduan ang mga private employers nga magpatuman sang flexible working arrangement sa ila mga empleyado.
Pananglitan nga absent ang isa ka empleyado bangud sa epekto sang community quarantine kag border control sa ila lugar, dapat nga i-charge ini sa iya existing leave credits.
Nagpapanaog naman sang department order ang ahensiya nga nagasaad sang guidelines kun paano makabaton sang financial support ang isa ka empleyado apang ini ang paga-applyan sang mismo employer kag iga-assess pa sang talatapan.
Posible suno diri nga P5, 000 ang igahatag sa isa ka empleyado nga apektado sang community quarantine apang sa karon ila pa nga ginahulat ang pondo para diri.
Ginklaro ni Sabrido nga ini ang aplikable lamang para sa formal sector workers bangud may mga lihok man sila nga ginahimo para sa mga informal sector workers.
Suno diri nga ila pagabuligan ang mga apektado nga empleyado sa informal sector pinaagi sa Tulong Panghanapbuhay sa Ating Disadvantaged/Displaced Workers ukon (TUPAD) program.
Ginklaro man ni Sabrido nga pananglitan ginpaidalom sa quarantine ang isa ka empleyado, indi ini sang ground agud nga ma-terminate siya sa iya nga trabaho.
