Nagapanawagan ang Department of Labor and Employment (DOLE) Regional Office VI sa mga employer sa Western Visayas nga pabaskugon ang mga tikang para sa seguridad sang mga mamumugon sa tunga sang padayon nga pagtaas sang heat index sa rehiyon.
Sa interview sang Bombo Radyo kay Atty. Ma. Ailyne Valaquio-Pueblo, Head sang DOLE Capiz Field Office, iya ginpahayag nga nakasaad sa Labor Advisory No. 08, series of 2023, nga kinahanglan magpatigayon ang mga pribado nga kumpanya sang mga tikang agud malikawan ang heat stress sa mga empleyado. Kalakip diri ang pag-usisa sa peligro sang exposure sa init, ilabi na sa mga may balatian kasubong sang hypertension kag sakit sa bato.
Suno kay Atty. Pueblo, kinahanglan man nga siguraduhon sang mga establisimyento ang maayos nga bentilasyon kag heat insulation sa mga workplace, kalakip ang pagbutang sang exhaust system kun kinahanglan.
Pahayag niya, ginaganyat man ang mga employer nga maghatag sang nagakaigo nga uniporme kag protective gear kasubong sang kalo, UV-protective goggles, kag presko nga bayo, subong man ang bastante kag libre nga tubig agud malikawan ang dehydration.
Dugang pa sang natungdan, ginasigurado sang ahensya nga handa sila maghatag sang teknikal nga bulig sa mga kumpanya pamaagi sa Occupational Safety and Health Center agud mapaayo ang mga safety program sa trabaho.
Interviewed by Bombo Saira Joy Alu-ad Bautista | via Zona Libre
