Nagpaandam ang Department of Labor and Employment (DOLE) sa mga job seeker batuk sa peke nga alok nga trabaho kag financial scams subong graduation season na naman.
Ginpaandam ni DOLE Sec. Bienvenido Laguesma nga sa nakaligad nga 2 tuig, gingamit sang mga scammer ang laragway ni Presidente Ferdinand Marcos Jr.agud ipromote ang peke nga bulig pinansiyal sa idalom sang programa nga pangkabuhayan sang DOLE nga Tulong Panghanapbuhay sa Ating Disadvantaged/Displaced Workers (TUPAD).
Kaangut sini, gintuad sang tiglikom nga maluwas sa padayon nga information dissemination pinaagi sang telebisyon, radio kag social media, nagapakig-angut na man sila sa Department of Information and Communications Technology (DICT) kag law enforcement agencies bangud sila ang may responsibilidad sa prosecution kag enforcement. Sa parte naman sang DOLE, ginahatagan na nila sang inputs ang nagakaigo nga ahensiya.
Ginapabaskog na man sang ahensiya ang information technology infrastructure sini para mabatuan ang cyberthreats.
