Nagpanugyan ang Department of Labor and Employment (DOLE) sa mga employer sa pribado nga sektor sa tama nga pasweldo sang New Year’s day, Enero 1, 2025 nga isa ka regular holiday.
Suno sa ahensiya ang mga empleyado nga nagtrabaho sa nasambit nga petsa ang kwalipikado nga makabaton sang double pay para sa una nga walo ka oras sang pagtrabaho.
Kun ang empleyado naman ang nag-overtime sa trabaho, dapat ini nga makabaton sang dugang nga 30% sang iya nga inoras nga sweldo sa amu nga adlaw.
Para naman sa mga empleyado nga magasulod sa nasambit nga regular holiday nga natuon nga rest day, dapat nga makabaton ang empleyado sang dugang nga 30% sang basic wage magluwas pa sa double pay.
Kun nagtrabaho naman sang lapaw sa walo ka oras sa regular holiday nga natuon sa day off sang empleyado, dapat nga makabaton ini sang dugang nga 30% sang inoras nga sweldo sa nasambit nga petsa.
Kun ang empleyado naman ang wala nagtrabaho, makabaton sa gihapon ini sang 100% sang iya nga sweldo, basta nagsulod ini ukon naka-leave of absence with pay antes ang regular holiday.
Kun ang adlaw naman antes ang regular holiday ang gindeklarar nga non-working day sa establisyimento ukon scheduled rest day sang empleyado, dapat sa gihapon nga makabaton sang holiday pay kun ang empleyado ang nagtrabaho ukon naka-leave of absence with pay sa adlaw antes ang non-working day ukon rest day.
