Ginpasalig sang Department of Labor and Employment (DOLE) nga makabenepisyo man ang mga minimum wage earners sa guwa sang Metro Manila sa wage increase.
Suno kay Labor Secretary Bienvenido Laguesma, lima na ka Regional Wage and Productivity Boards ang nagsugod na sa proseso para sa bag-o nga wage hike: Region 1 (Ilocos), Region 2 (Cagayan Valley), Region 3 (Central Luzon), Region 4A (Calabarzon), kag Region 7 (Central Visayas).
Ini suno kay Laguesma angut sa mandu ni Presidente Ferdinand Marcos Jr nga magpatigayon sang gilayon nga pagrepaso sa regional minimum wage rates sa sulod sang 60 ka adlaw humalin sang nagligad nga wage order.
Sa panibag-o nga pagsaka, magataas ang daily minimum wage sa NCR halin sa P645 pakadto sa P695 para sa non-agriculture sector, kag halin sa P608 pakadto sa P658 para sa agriculture, retail kag service establishments nga may 15 ukon mas manubo pa nga mga empleyado, kag manufacturing firms nga may manubo sa 10 ka regular workers.
Magluwas sa ginabulubanta nga 5 ka milyon nga minimum wage earners, mahimo man suno kay Laguesma nga makabenepisyo ang ginabanta nga 8 ka milyon nga mga mamumugon nga nagasweldo sang mas mataas sa minimum wage.
Ang mga magagmay nga negosyo nga indi magsobra sa 10 ka mga empleyado kag mga kumpaniya nga apektado sang mga kalamidad ukon krisis ang ginapahanugutan nga maghingyo sang exemption sa increase. Ang mga Registered Barangay Micro Business Enterprises wala man sakop sang minimum wage law.
