ROXAS CITY – May gindihon nga programa ang Department of Labor and Employment (DOLE) sa rehiyon 6 para sa mga formal kag informal sector workers sa Western Visayas nga naapektuhan sang enhanced community quarantine bangud sa coronavirus disease 2019 (COVID-19).
Ginpahayag ni Niezel Anen Sabrido, senior labor and employment kag labor communications officer sang Department of Labor and Employment (DOLE) Region 6, mahimo maka-avail sang COVID-19 Adjustment Measures Program (CAMP) sang ahensiya ang mga trabahador nga yara sa formal kag informal sector.
Makabaton sang one time financial support nga P5,000 ang mga trabahador sa formal sector sa idalum sang programa sang DOLE.
Ginklaro sang DOLE nga indi empleyado ang ma-apply kundi ang employer.
Kun wala nag-apply ang employer, magpakig-angut lamang ang DOLE bangud pagkatapos sang krisis sa COVID-19, priority ang nasambit nga kompaniya nga inspeksyunon sang DOLE.
Kun ma-release ang assistance, indi ini
magdiretso sa employer kundi sa empleyado.
Kun wala sang Landbank account ang empleyado, mahimo ihatag paagi sa money remittance.
Nagapanawagan ang DOLE sa mga employers nga
mag-apply na para mahatagan sang benepisyo ang ila mga empleyado.
Sa bahin naman sang informal sector, mga trabahador nga wala sang employers kasubong sa mga vendors kag yara sa marginalized sector, may programa ang DOLE nga TUPAD-BARANGAY KO, BAHAY KO UKON TUPAD BKBK.
Pagahatagan sang emergency employment ang nasambit nga mga trabahador sa sulod sang napulo ka adlaw sa diin magabaton sila sang sweldo nga P395 kada adlaw.
Ang ila mangin trabaho amo ang paglimpyo kag pagdis-infect sa ila mga balay kag sa ila palibot agud malikawan ang COVID-19.
Bangud mangin partner sang DOLE sa programa ang mga LGU’s naghinyo ang opisyal sa mga natungdan nga barangay officials nga likawan ang magpamulitika, bangud katuyuan sang programa nga mabuligan ang mga trabahador nga nadulaan sang trabaho bangud sa COVID-19.
Samtang ginklaro man ni Sabrido nga indi mahimo mangin balasehan sa pagterminate sa empleyado ang kapaslawan nga makareport sa trabaho bangud wala sang masakyan matapos nga nag-untat sa pagbiyahe ang mga pampubliko nga salakyan bangud sa COVID-19.
