Nagapadayon ang drainage declogging kag desilting operations sa mga barangay sang Lawaan, Barangay 2 kag Barangay 8 pinaagi sa bulig sang mga benepisyaryo sang Department of Labor and Employment (DOLE) Tulong Panghanapbuhay sa Ating Disadvantaged/Displaced Workers ukon TUPAD program.
Sa pihak sang mabudlay kag mainit nga trabaho, ginpakita sang mga benepisyaryo ang ila dedikasyon kag pagserbisyo para masiguro ang mas malimpyo kag mas maayo nga dalan agud malikawan ang pagbaha kag pagbara sang mga kanal sa komunidad.
Indi lamang pagpanilhig ang ila ginahimo kundi aktwal nga pag-ulikid kag pagtinlo sang mga drainage system nga may daku nga bulig sa pagpabilin sang kaayuhan kag kalimpyo sang palibot.
Ang amo nga mga buluhaton kabahin man sang community-based emergency employment programs sang DOLE-TUPAD nga nagahatag sang temporaryo nga trabaho samtang nagaserbisyo sa komunidad.
Base sa mga report sang nagkalain-lain nga ahensya kag programa sang gobyerno, ang declogging kag desilting activities importante nga tikang sa flood prevention kag maintenance sang drainage systems, ilabi na subong nga nagaabot ang tion sang pag-ulan.
Ginpabutyag man sang komunidad ang pagpasalamat sa sakripisyo kag pagpaninguha sang mga TUPAD beneficiaries nga bisan sa mabudlay nga sitwasyon, padayon nga nagaobra nga may dignidad kag dedikasyon para sa kaayuhan sang ila barangay.
