CAPIZ – Wala sang may nabaton nga petition para sa wage increase sa Western Visayas ang Department of Labor and Employment Region 6 sa pihak sang nagataas nga global tensions sa posible epekto sa ekonomiya sang Middle East crisis.
Suno kay DOLE Region 6 director Atty. Sixto Rodriguez Jr., tuman ka importante ang tion subong bangud ang problema sa Middle East ang mahimo mag-apekto sa mga negosyo nga mag-agunto kag mga mamumugon nga madulaan sang trabaho.
Ginalantaw sang ahensya nga kun maglala pa ang sitwasyon, posible nga may mga trabaho nga mauntat sa palaabuton.
Apang nagpasalig ang DOLE nga magabulig ini sa mga mamumugon pinaagi sa mga support programs.
Nagaplano ang DOLE sang programa kaangay sang COVID-19 agud makabulig sa mga mamumugon nga madulaan sang trabaho, apang gina-finalize pa ang detalye.
Sa subong, wala sang kompaniya nga reported nga may gin-layoff nga trabahador.
Kun salary increase ang istoryahan, may pagsulondan nga indi mahimo mabag-o ang sweldo sa sulod sang isa ka tuig magluwas lang kun may dako gid nga rason kaangay sang padayon nga pagtaas sang presyo sang mga balaklon.
