Gin-aprubahan sang Department of Transportation (DOTr) ang rekomendasyon nga pasakaan ang plete sang mga public utility vehicles (PUVs).
Ginkumpirma ni DOTr Secretary Giovanni Lopez nga nagpagwa siya sang memorandum para sa Land Transportation Franchising and Regulatory Board (LTFRB) nga naga-lift sang suspensyon sa pagpasaka sang plete.
Ang memorandum, nga may petsa Setyembre 24, nagasuporta sa fare adjustment nga gin-aprubahan sang LTFRB sang Marso 2026, lakip ang provisional fare adjustments para sa UV Express kag taxi services samtang ginahulat ang desisyon sa ila mga petisyon.
Suno sa DOTr, ginkonsidera sa desisyon ang nagasaka nga operating costs nga ginaatubang sang mga operator sang pampubliko nga transportasyon kag ang kinahanglanon nga mapadayon nga magamit kag mangin sustainable ang serbisyo publiko sa transportasyon.
Maumpisa ang implementasyon sang aprubado nga fare adjustments sa Lunes, Setyembre 28.
Base sa mga rate nga gin-aprubahan sang Marso, amo ini ang bag-o nga plete:
Traditional jeepney: P1 nga saka sa minimum fare, halin P13 mangin P14.
Modern jeepney: P2 nga saka, halin P15 mangin P17.
Ordinary Metro Manila/city buses: P2 nga saka sa minimum fare, halin P13 mangin P15.
Air-conditioned Metro Manila/city buses: P3 nga saka, halin P15 mangin P18.
Ordinary provincial buses: P1 nga saka sa minimum fare, halin P11 mangin P12.
Air-conditioned provincial buses: P2.45 nga saka sa tagsa ka succeeding kilometer.
Airport taxis: P40 nga saka sa flag-down rate para sa una nga 500 metros, halin P75 mangin P115.
TNVS: P20 nga saka sa base fare, depende sa sahi sang salakyan.
P2P buses: 15 porsyento nga saka sa plete.
Ginmanduan sang LTFRB nga siguruhon nga ang mga operator kag driver magbutang sang bag-o nga fare matrix sa sulod sang ila mga salakyan antes manukot sang bag-o nga plete.
Ginmanudan man ang board nga siguruhon nga magapabilin ang mandatory fare discounts para sa mga estudyante, senior citizen kag persons with disabilities (PWDs).
Kinahanglan man sang LTFRB nga ipahibalo sa publiko ang bag-o nga mga plete, mag-monitor sang pagsunod sini kag hatagan sang tikang ang mga reklamo may kaangtanan sa sobra nga pagpanukot.
Samtang, gin-evaluate sang mga regulator sang transportasyon sa Pilipinas ang mga petisyon para sa fare hike bangud sa nagadugang nga pressure sa mga driver kag sa ginalauman nga daku nga pagsaka sang presyo sang lokal nga gasolina.
Nagasunod ini sa mga protesta sa Metro Manila, kun sa diin ginpahayag sang transport group nga Piston sang Martes nga magapatigayon ini sang nationwide transport strike sa Setyembre 29 kag 30 bangud sa nagasaka nga presyo sang gasolina.
