ROXAS CITY, CAPIZ – Ginpasakaan sang graft and corruption charges sang Crimes and Corruption Watch International Inc. ang mga opisyal sang Department of Public Works and Highways Region 6 bangud sa ginaalegar pagdaya sa bidding process agud magpabor sa International Builders Corp. (IBC), ang pinakadako nga contractor sa Western Visayas.
Lakip sa mga ginpasakaan sang kaso amo sanday Regional Director Sonny Boy Oropel, mga district engineers nga sanday Roy Pacanan, Bernadette Betsy Uy, Allan Rey Pajimna, Randolfo Melosantos, kag Robert Palmera.
Yara man bilang respondents sanday DPWH-6 Bids and Awards Committee Chairperson Mary Grace Bulaquina-Hachuela, Vice Chairperson Marilou Zamora amo man ang mga myembro nga sanday Ormel Santos, Gladwyn Ledesma, Roland Victorino, kag Ricardo Gutierrez.
Suno kay CCWII Chairman Dr. Carlo Batalla, sa P9 billion nga government infrastructure projects sa idalom sang DPWH Region 6, halos P2.4 billion gid ang gin-award sa International Builders Corp. para lang sa tuig 2024.
Pahayag niya, kinahanglan nga maimbestigaran sang otoridad ang mga alegasyon tuhoy sa bidding process sang mga proyekto.
Ginlakip man sang CCWII si IBC President Helen Edith Lee Tan sa graft and corruption complaint sa Ombudsman.
Nahibaluan nga ang IBC amo ang contractor sang palpak nga Ungka Flyover kag Aganan Flyover sa Iloilo.
