ROXAS CITY, CAPIZ – Nanindugan si Department of Public Works and Highways Region 6 Director Engr. Sonny Boy Oropel nga wala sang may ginapaboran nga contractor ang ahensya baliskad sa nangin pahayag sang Crimes and Corruption Watch International, Inc. nga nagresulta sa pagpasaka nila sang graft and corruption charges sa mga ospiyal sang DPWH Region 6.
Kahapon, Mayo 21, ginpasakaan sang kaso sang nasambit nga grupo sanday Regional Director Oropel, mga district engineers nga sanday Roy Pacanan, Bernadette Betsy Uy, Allan Rey Pajimna, Randolfo Melosantos, kag Robert Palmera.
Yara man bilang respondents sanday DPWH-6 Bids and Awards Committee Chairperson Mary Grace Bulaquina-Hachuela, Vice Chairperson Marilou Zamora amo man ang mga myembro nga sanday Ormel Santos, Gladwyn Ledesma, Roland Victorino, kag Ricardo Gutierrez.
Ginlakip man sang CCWII si IBC President Helen Edith Lee Tan sa graft and corruption complaint sa Ombudsman.
Sa exclusive interview sang Bombo Radyo kay Director Oropel, iya ginpahayag nga sang nagliligad nga tuig, nagpasaka man sang kaso sa Ombudsman ang Crimes and Corruption Watch International, Inc. batuk sa mga opisyal sadto sang DPWH Region 6 kag ini ang na-dismiss bangud sa kakulangan sang merito.
Gani, nagapati ang Director nga ma-dismiss ang kaso sa tion nga i-require sila sang Ombudsman nga masabat.
Sa pagkamatuod suno kay Oropel, wala siya sang partisipasyon amo man ang mga District Engineers sa procurement activity sang bidding process.
Paathag sang natungdan, gina-live stream ang bidding process sa diin tanan nga mga observers kag participants ang makakita sang proseso agud mapabilin nga ini ang transparent.
Wala man sang findings ang Commission on Audit sa Department of Public Works and Highways Region 6 kun may yara sang anomaliya sa bidding process.
Dugang pa sang Director, posible nga luyag lang sang Crimes and Corruption Watch International, Inc. nga pakahuy-an kag pahugon ang DPWH Region 6.
