Nagtestigo sa Sandiganbayan Third Division ang suspendido nga Department of Public Works and Highways (DPWH) Bulacan 1st District Engineering Office engineer nga si John Carlo Rivera, nga ginapahayag nagkolekta sang “commitment fees” halin sa mga kontraktor sa mando sang iya anay superior nga si former district engineer Henry Alcantara.
Suno kay Rivera, ginpatigayon niya ang pagkolekta sang amo nga bayad gikan sa mga kontraktor sa idalum sang mandu ni Alcantara, sa tunga sang padayon nga hearing sang kaso nga may kaangtanan sa ginapahayag flood control corruption scandal nga nagalakip sa pila ka opisyal kag personalidad, upod ang anay Senador Ramon Revilla Jr., kag mga anay opisyal sang DPWH.
Ginpaathag ni Rivera nga ginmanduan siya ni Alcantara nga maghimo sang lista sang flood control projects nga ipasakop sa National Expenditure Program, General Appropriations, kag unprogrammed appropriations, upod ang mga kontraktor kag opisyal nga may kaangtanan sa pagbayad sang commitment fee.
Gin-ako man sang testigo nga may mga pagduha-duha siya sa una parte sa mga ginapahimo sa iya, apang ginpadayon niya gihapon ang pagpatuman sang mga mandu, lakip na ang pag-coordinate sa mga kontraktor kag pagbaton sang mga bayad.
Suno sa iya, ginakilala niya nga ilegal ang amo nga sistema, apang nagasunod lamang siya sa direktiba sang iya superior.
Ginpahayag pa ni Rivera nga mga 50 ka beses siya nakabaton sang delivery sang commitment fees halin 2022 tubtob 2025, nga iya man gin-turn over kay Alcantara.
Kada delivery ginapatihan nga nagalibot sa mga P10 milyon.
Iya man gin-isa-isa ang pila ka kontraktor nga ginakabig nga naghatag sang bayad, lakip ang JB Construction, Triple A Construction, Topnotch Builders, Flordes Construction, kag IM Construction.
Gin-ako man sang testigo nga nakabaton siya sang dugang nga P10,000 kada bulan lakip sa iya suweldo bilang benepisyo halin sa amo nga sistema.
Suno pa kay Rivera, posible nga si Alcantara kag anay DPWH Usec. Roberto Bernardo ang nagapanguna sa ginapahayag kickback scheme sa Bulacan flood control projects, base sa iya obserbasyon kag mga impormasyon nga iya nakuha.
Si Alcantara kag Bernardo ang pareho man nga ginakabig nga state witness sang prosecution sa nagapadayon nga imbestigasyon sa kaso.
