ROXAS CITY – Ginklaro sang Department of Public Ways and Highways (DPWH) 1st Engineering District ang pila ka mga rason may kaangtanan sa mga ongoing nga mga proyekto sang ahensya sa syudad sang Roxas.
Sa interview sang Bombo Radyo kay Engr. Julius Abella, Chief sang Construction Section sang DPWH 1st Engineering District suno diri madamo sang proyekto ang ahensya ang nakalinyada kag pagatinguhaan nga matapos subong nga tuig.
Aminado man si Abella nga may yara sang delay sa construction sa bahin sang Rizal St. bangud pigado ang pundasyon sang amu nga lugar kag pagabayluhan na lang ang konkreto antes butangan sang asphalt overlay kag pagasuguran ini sa masunod nga bulan.
Dugang pa sini nga bangud sa pabag-o bag-o nga panahon nagaka-atrasar ang pag-ubra sa mga naumpisahan na nga proyekto.
Ginahulat man sang ahensya ang permit gikan sa gobyerno agud suguran na ang mga nakalinyada nga proyekto nga na-untat bangud sa nakaligad nga eleksyon kag transition period.
Napapangayo man ini sang pasaylo bangud sa istorbo nga natuga sini bangud sa pagkadelay sang construction apang ginasiguro ni Abella ang kalidad sang ila proyekto.
Samtang, ginpanginwala naman ni Abella ang alegasyon nga wala sang nakahamtang nga warning signs sa gina-construct nga drainage system sa Barangay Lawaan nga gintunaan sang pagkahulog sang isa ka motorista.
Suno diri kumpleto kag bastante ang mga early warning devices kag ginsiguro gid sini nga makit-an sang mga driver ilabi na ang mga motorista agud malikawan ang disgrasya sa dalanon.
Matandaan nga nahulog ang isa ka motorsiklo sa drainage system nga ginakay-o sang DPWH kag ginapahayag wala sini natalupangdan ang warning signs nga nakabutang sa amu nga lugar.
Panindugan man ni Abella nga masanag sa amu nga lugar kag impossible nga indi makit-an ang mga warning signs.
